Autobiography of Rev.Dr.Samuel Nang Khan Do

KA NAUPA SERGEANT SIAN ZA KHAM IN HONG MUH ZIA BANGIN KA THU A
ATNA

Pasian’ hehpihna tawh pian kum 60 cing, a Tapidaw suah kum 50 cing, Pasian’ na a sep kum 25 cing, a it a zi tawh kum 32 lukhap khat khapkhawm, Pasian in tanu tapa unau sawm pia, om na’ng khawl na’ng inn zong pia a tangthu a at ciangin, lungdampihna lai tawh pahtawina lai ka at hi.

Ka u S.Nang Khan Do tawh nu unau hi napi’n tangah baih mamah ka hih manun, sungkhat suak bangin ka nu Ngoih in hong bawlin, simngam zongam ah hong masuan a, singnuai ngam mualah khaupiteep hawkna dongin, sumzon paizon dan hong makaih hi.

Ka sangkah seih uh ciangin zong, ka unau mahun ka kah khawm uh a, Suangpi Private Sang ah tan khat ka on zawh uh teh, Theizang kumpi sangah zong ka kah khawm uh hi.

Ka sangkahna uh ah, Topa’ huhna tawh lai zong a siamlam pawlin ka om uh a, ngamtat luheek ah zong ka Siapipa uh Ngul Khaw Kam in hong ensei in, kum khat sungin tannih le tanthum hong sintosak khawmin hong zosak lalai hi.

Tanli ka zawh uh ciangin, Tedim a ka u pi uh, Bo Kham Nang in, na unau un keima kiang pan hong kah un hong ci napi, kei bek kakah a, Ka u Do in sum zong tawmin, a sum ngah teng tawh phung hong zong masa a, ka nu uh “man” a piakkhit 1960 kum ciangin a sangah Kawl panin kipan leh pan hi.

Sumzon sungin zong a sangkah nop manin sumcil mamahin, ngam sunga tanzik, vanbaalteh hawng neek a sawmleh,ki nesei het o cingei liang hi. A sangkah ki pat a kipanin hanciam mamah a hih manin kumsikin ongto a, 1965 kumin Kale Mo pan High School final zoin, a zawh kum mahin kauhpetinan Zum ah laiat sem kawmin tansawm zong ‘B’ tawh zo lai hi.

Kumpinu’ na kum thum sung a sep khit ciangin, pianna khua le tui ing deihsak na tawh a nasepna pan khawlin, khua-ah tanlang pan tan li dong kum li sung sum le pai la lo in Sang hong phuan hi.

Ngaihsut bangin khuapih tuipihte’ khantohna a muh kholloh ciangin, Falam a Lai Siangtho Sang-ah kum li sung hong kah-a Diploma in Theology (Dip. Theol.) hong ngah khit teh, Ngalzang, Suangpi Pawlpi kem kawmin pilna Sang-ah zong hong sem khawkhawm hi.

Thu tuatuam hang tawh Suangpi pan Ngalzang-ah kum nga sung hong om leleu a, Thuklai Sangpi tawh kizomin, tannga pan tanliat dong amah nguak mah in hong sem hi. Pasian’ huhna tawh tanliat Kumpi laihuanna-ah zong a sangnaupangte sang dang te sangin a ong zong tamzaw-in, sia te’n zong pakta tek hi.

Ka u Do in a nuntak sungin hi anuai-a thu nam kua teng nuntakpihin nei hi, ci in ka musei hi.

(1) Mi’ neihsa a songin zang nuam hetlo hi.
(2) A hih zawh sung amah le amah a ding lenglang nuam pa khatin ka mu hi.
(3) A nuntakna ka et ciangin thuakzawhhatna zong nei mamah pa khatin ka mu hi.
(4) Cihtakna le hanciam tentanna bulphuhin a nungta nuam pa khatin ka ciam the hi.
(5) Thumanlopi a mi’ mawhsakna leh nuaisiahna zong a thuak nuam tuan lo pa khatin ka mu hi.
(6) Mi tampite’ nuntakna a huh nuam pa khat ahi hi.
(7) Mi bang hi leh, mizawngte a huh nuam pa khat ahi hi.
(8) Leitawi tawh a nungta nuamlo, puksi nuam zaw liang pa khatin ka mu hi.
(9) Cil tentanin, a ki sam tatak lo buang sum a zangkheh nuam hetlo pa ahi hi.

Hi ka u ii nuntak zia tawh nungta zo tek hi le’ng, Vantung-leitung’ ingin zong hoihbel taw, ka ci hi.

Mite in ai ma’n hong thusimsak loh teei hangin, a tunga thu nam kuate tawh a nun takna hangin tuni ciangdong, a u a nau leh biakna dongah pahtawina a ngah hi, ci in a MUALSUANG tanga a at hi laibu ah pahtawina in lungdampihna lai ka at hi.

A Nau,

Sian Za Kham