Autobiography of Rev.Dr.Samuel Nang Khan Do

KVBA E&M DIRECTOR KUM NIH SUNG SEM

1994 pan kipan KVBA zumah E&M Director in ka om leleu a, 1995 dong ka semsuak hi. 1996 KVBA Kumcin Kikhop Angteng pan E&M nasep ka khawl leleu a, 1996 March sa pan kipan Pawlpikem Sia-in ka om leleu hi.

KVBA pan Pawlpi ka zot kum mah in, Germany pan E&M nasem Mr.Jochim Kummerfelt in na pa Pasian’ na nasep na’ng, ci in ka tapa David Pauno’ tungtawn in sum K.70,000(tul sawm salih) hong saak hi.

Hi sumte a no suaksak ingin sangngampa ahi Tual Mang ka ap a, ama’ hong huhna tawh Mandalay pan sangngampa Ngo Pau in kei tawh kituak ingin, Senbawl Motor Cycle khat hong leisak a, ka lungdam mamah hi. Ka nu’ hong puak phawk lei ka hih manin ka cycle min ‘Ka nu’ ci in ka at hi.

Hi bangin kei’ ing hong deihsak a hong ngimpih hong tawlpihte, sum le pai tawh hong huh hong tawlpihte’ ingin ka kamtam nangawm tawh suk zo lo ka hih manin, kei’ suk tangin Pasian in hong suksak ta hen cih ka thungetna ahi hi.

MUNLAI - PASTOR AREA SUAK

Kum 1997 ciangin Pawlpi mite in, a inn in hi taleh, mimal-in hi taleh, sum le pai ah hi taleh, cing tei i hih ciangin Area khat a din seih na’ngin i nu ahi Tahan Pastor Area ah ngen tawng, ci in vekpi lungkim in, Area Kumcin Kikhopna ah thu a kisun leh, Pasian’ hong deihsakna hiing hi ve’n hong kipia paih a, tu kum a kipan in Munlai Tuiphum Pawlpi pen Area dinmun ah a kiding suak hi.

Nu ahi Tahan Pastor Area in zong hong thupha piakna in B.U(6’x 3’) khat tawh hong sa hi.

1998 September 22 ni in, tapano nih piang a, ka pu Thang Vung dapsakin ‘Vung Khat Suan’ leh ‘Vung Cin Kap’ ci in a min ka phuak uh hi.

HAMPHATNA

Leitung thu ah hi taleh, Kha thu ah hi taleh, kicinna neilopi mahin, Ama’na ka sep tu kum March 31, 2001 ciangin kum sawmnih le nga hong cing sei a, KVBA ii ngeina om bangin, Munlai Pawlpi a a tung a vei 46 na KVBA Khawmpi panin KVBA; KVBA MC; Area min, Pawlpi min, mimal min tawh leh innteek Pawlpi in zong, Pawlpi min, Numei min, Khangno min, minal min tawh pahtawina hong piak banah, a tawntung a a kimusei ingin mann(datpong) tawh hi taleh, Mellahtongsan (Video) hi taleh hong lain, ka inn dong Pawlpi upate leh Sianu in hong kalpihin lungdamna kisoi sei lo hi.

Ka inn lam panin zong melseih teng in hong muakin, maitai takin ka nupa un ong dawn manun zong, ka khan sungah Topa’ thupha hangin ka lungdamna hi lianbel hi, ci in ka ciamteh hi.

Mailam ah zong Topa’ mah in hi Pawlpi a nungta, a khangto, a picing a suah seih na’ngin ka thungetna lian bel ahi hi.

A kicinglote a kicingsak Topa in, nikhat ni ciangin i soi ngam loh, i sunmangte hong tangtung sak takpi ing hi, cih zong ka lametna bulpi ahi hi.