Autobiography of Rev.Dr.Samuel Nang Khan Do

Tu-laitak Ngalzang ka behte teng, Pawlpi leh u le naute’n ka inn uh hong phelsak in ka nu in zong ka lamkiatna hi, kei zing ut ing, a cih ciangin ka nu’ utna zui in Ngalzang ah ka om uh hi.

Khiangtam pan Ngalzang ka kikhin uh pen 1980 kum December ni 10 ni-in ka ciamteh hi. Ngalzang ah ka makpa U Kham Khaw Cin te innkuan tawh ka zuan uh a, pawlkhatte ahih leh Kawl mah na zuan paih uh hi.

Tulaitak-a Tahan Nayme 15 sanglam ka ki khinna uh ahih manin ‘Suangpi Veng’ ka ci uh hi. Midangte’n Khuaikai Veng’ a cihna ii sanglam munteng hi a, tu’n Suangpi pan a pai teng ka kingawm uh ciangin inn 20 kiim bang kipha hi.

Ngalzang ka tai ma uh, Khiangtam panin tapa khat ka nei uh a, ka pu Thang Suan dapsakin “Suan Cin Kam” a min neipa’ phuak hi. February 3, 1979 ni in suak hi.

ORDINATION NGAHNA

1979 kum April 15, Khuasak Diamond Jubilee ah Sizang Khenkhat Upate’ lungkimna tawh kei hong donglopi in Ordination piak ingin na khensat uh a, seihkhollohpi’n biak kikhop napan ZBC General Secretary C. Hrang Tin Khum in hong samin thu tampi hong khaatkhit teh, a khangham sia salih te’n khut ngakna hong nei in, MBC General Secretary Rev.Victor Sanlone in thu hong ngetsak hi. Tuhun lai a deihsakna tak tawh thu hong dong, thu hong ngetsak Siate kimkhat Topa’ khiangah tawlnga khin zo uh hi.

NGALZANG OM SUNG THUPIANGTE

Ngalzang ka om sungun ka nu’ lungngulhna zong ahih manin nuam ka sa uh hi. Ka naupa Suan Do in innsa ngamsa a muh pawpoh tawh ka nu om loin ne lo ahih manin thupha ngahin, ngam a vak poh ciangin a khut nguakin kal ngeilo hi. A lamdang khat, ka nu’ hong nusiat ciangin a khut zong hong tawp paih hi. January 16, 1982 ni-in tanu khat nei in, ka sungnu dapsakin ‘Awi Ngaih Don’ ka phuak hi.

Pauno’ nu zong utlopi a pai ahih hang Ngalzang a om sungin cidam mamah hi. Jan. 3, 1985 ni in tapa khat nei in a pano’ min la-in ‘Thang Khan Khai’ ka phuak leleu uh hi. Ka nu’ hong dampih sung Ngalzang a ka om uh mah ka khan sung a nuambel suak hi.