Autobiography of Rev.Dr.Samuel Nang Khan Do

PAWLPIKEM SIA SEP KIPATNA

1976 kumin Diploma in Theology ka ngah khit teh, Suangpi le Ngalzang Pawlpi kem ingin sa khat Ks.40 mah tawh ka suahkhawm hi. Ka sangkah ma-a ka tanli sang phot pen ka man ciangin Kumpi Sang-in hi kum mah in kikipsak hi. 1976 April 1 ni-in ka Pawlpi kem ingin Sia sep ka kipan hi.

Hi kum mah October 25 ni-in tapa khat ka nei leleu uh a, ka sungpa En Lang dapsakin ‘Lang Khan Dong’ ka phuak uh hi.

Pawlpikem sia ka sep kum mahin Thangkai khua thum khangno kipawlna zong kaphuan paih uh a, tuni dongin zom sei lai uh a 1996 kuma 19 veina kikhopna pan zong aphuankheh minpu in steel kuang khat zong hong pia uh a, ka lungdam mah hi.

Hi kum mah in, khua ka tun ma-a, upa hausate’n a lungkimna uh tawh khua khin na-ah ka inn ka lo phelkheh in, amau’ ciapteh nasa Khiangtam munah ka inn ka lam hi. Thu tuatuam hangin kumthum philphial zong om man loin ka kikhin leh leleu uh hi. ( Hi ka kikhin na thu a seitel nuamte in ka khiangah hong dong le u cin a kicing in kong soi ing hi.)

PAWLPIKEM SIA LEH MANGLAI SANGSIA

1979 kum ciangin Ngalzang le Suangpi kipawl in Manglai Sang kiphuan a, ahilh ingin kei hong cial uh hi. Kipat kum in tan nga mah pan kipan in, 1984 kum tan liat dong ka phuan uh hi.

Midang kicial zolo ahih manin, zingsang nai 7:00 pan nitak nai 5:00 dong kisem suak ahih manin kasabei in an nangawn ka nek zawhloh hun om hi.

Kiphatna loin, ka sep sungteng ka sangnaupangte’ laionna pen Sangdangte sang zong a hoihzaw lam vive hi zaw ahih manin mi’n zong hong pakta sei bilbel hi.

Pasian’ hong huhna tawh tanliatte bang kimuang hetlopi’n a ong hawng hong om tak ciangin ka lungdamin Pasian ka phat hi. Ai hang hiam cih leh, Sangdangte tanliat ah a kawngkolh zong om uh hi.

KHIANGTAM KHUA SATNA: NGALZANG-AH KUM NGA SUNG OM

Ka soi khitsa mah bangin khua U-pate’ lungkimna tawh Suangpi’ khua nuai Khiangtam khua sat ingin na kipan lia-lua uh a, ‘kei zong innmun khat vanpam lhualna’n hong pia un’ ka cih leh ‘ateng paih ing sialloh ki pialo ing’ a kicih ciangin ka inn ka lo balkekin ka inn ka lamsuk paih hi. ‘A masate nunung ing a, a nunungte masa ing’ a cih bangin, kei alam masa bel ka suak a, tu laitak khua hausa lam pan Kumpite’ hong huhna antang leh van tuatuamte nesim ahih manun a hauhsakza uh hong kia uh hi. Amau’ makaihna ahih notloh ciangin sangnaulak-in amau’ thu-a na akisem sempoh dokleh in buaina tampi hong piangsak hi. Makaite lah u leh nau le pi leh pu teng vive ahih manin thu le la ki neih se sang Kawl lam zuan heuh tawng ci in ka kisawi uh hi.