Autobiography of Rev.Dr.Samuel Nang Khan Do

KA NU’ SONGKIATNA

Tan kua ka sinkum ciangin ka nu leh ka u Ciin in ka pil na’ng hong deihsakna uh tawh mi’ beng ciin’na ah na kihel ih a, tavuankhante’n zolo ahih manin, ka nu zong Mandalay song sungah kumlang song kia hi.

Ka nu ii songkiat ciangin kei zong ka tung en leng vang-in, ka nuai en leng bing a, cih na’ng lawh na’ng seilopi mah in ka om hi.

Ka nu’ songkiat ka lunglen ka khuangaih tawh, kumpi laihuanna tan kua phi ingin ka kipat ciangin, kilametna khat zong neilo pa’ tungah zawhna hong pia Pasian’ min ka phat hi.

Aihanghiam cih leh, kei uh Art line pan mi 53 lakah numei nih leh kei bek in ka ong uh a, 50 te amin uh hong kihello hi. Kei’ muhna ah, kei sang a pilzaw, a siamzaw tampitak zong kia ka cih ciangin, tangah pakhatte Pasian in huh takpi hi cih ka mu sesem hi.

Ka nu song a kiatna pan hi bangin la na phuak hi.

(a) Lunta sinthu piandang sa’ng e,
       Lamtui vangkhua mel mu’ng ee.
(b) Lamtui vangkhua, kangtui kangtui saumang,
       Kaih minin na luang hen aw.

Amah bek hilo, khuapih tuipih teng tawh kiakhawm khin ahih manun,

(a) Ciin tawh, tuai tawh zatam zingzin,
       Dosau haibang ngak hang ee,
(b) Sialsial ing ee, tuai nih thum aw,
       Khamtang ka luansi hi ee.

na ci hi. Ka nu in a ki hehnepna tuibuk a phuahna hi.

(a) Heh luat naubang ka kinepna,
       Huang zawl ka nah neu aw ee.
(b) Lungzuan pahtang ka tuanna, sawmtaang zaakna,
       Von leh ka pahtang aw e.

Nitak lam a a khawlna, a tate tawh thu a kikupnate a phuah ahi hi.

A upa, kapu Suan a phuah la:

(a) Ka ciin banzal henkol khaihna
       Kawlciang a tawina hi ee.
(b) Kawlciang a tawina hi ee,
       Sang cih a zialna hi ee.

ci in na phuah kawkawi hi.

Ka nu in a songkiatna pan a tanote hong phuah la:

(a) Na zua kiaknu von ii lungtup,
       Khuacih gulbang vial ing ee.
(b) Sian tawh gamgul bang vial ing ee,
       Lailung na lau kha na cia.

ci in hong hehnem hi. Ka tankua kum hi a, laihuan kuan ahih si tawh ka nu veh man hetlo, ama’n lah hong munuam mamah ahih manin hi bangin la hong phuah hi.

(a) Vaibang samna dota kankong,
       Lia nu’n laambang en ing ee.
(b) Zangni suak ee, kuamzang tan ee,
       Von aw, nong hei ging sa’ng ee.

Ka tapa hong pai tang am ci a a khuadak kawkawm a a situi mal tawh hong phuah la hi.