Autobiography of Rev.Dr.Samuel Nang Khan Do

Nitak ka kal uh ciangin, ka pu in Thang Ngoih ai deih na hiam ci in veithum veili a cicih ciangin ka nu heh pianin, ei ngunsungte i kisakna Sialsutpuan hi, a cih leh ka pu zong a ngial hong suakin, ka zawn ka ngau hong seilo na hiam, ci in ka piaksa uh ka nu’ man um le beel teng a kong sangah hong suuksuk hi.

Tu nitakin thupha kipiakna tawh inn zuan ing pen sinngim lungkhamna tawh inn ka zuan a, nitakin ka pa Suan Thawng leh ka u Suang mah tawh kikumin, a zingsang khua hong vaak ciangin, ka u Suang ii bawngla khat tawh pute’ mai en ingin, zu beelpi mah masuanin ka kuan leleu uh hi. Hi teng ciang ahih leh ka pu zong paunawn hetloin hong sang hi.

Hi bang teng thu ka ngaihsut ciangin, ka pute’n hong it mamah ci in zong ka lungdam a, ahi zongin hong itna uh pen kei ingin vanpuak haksapi hong nguanguan tawh kibang kasa hi.

SANGKAH KIPATNA

Ka phung ka nam lah zong khin, ka nu’ man lah pia khin, ka laiseihna lah beisei nailo, ka nu’n lah zi neih ing bek hong kun hi kawmkal pan ka nu ii a khut sunga a hum tentan sum K.90 (sihlohnguan) om lai tawh annek tuidawn a olna bel Kawlzang, Munlai a ka pi Awi Khaw Cing te beelin 1960-61 tan nga sin ing ka kuansuk hi. Lai tawh ka kizoploh kum nga bang sawt ahih manin, ka siate leh ka kim ka pam a te’ hong paupihna pen baibek ham bangin za lel ka hih man, ka lungkham in nitak khat bang ka kapsim liang hi.

Kampu tel zo lo ka hih manin hong kipia lai peumah vakikamngah in ka hanciam a, laihuanpi hong tun ciangin kiummawh lopi in a ong lamah ka min na kisuang bilbel hi.

Ka kipat kum pen buhcimtui bek mah tawh kum khat sung ka kikhual na’nga haksa ka sakkhat in, konglak a akivawk puanten tawngbawng khat tawh kum khat sang kakah pen ka laiseihloh sang na kasazaw hi.

Tan ng ka on ciangin zomnuamlai ka hih manin ka u Ciin tawh vei thum, ka nu tawh vei thum ngamsung ah khauptep hawkin keenlak ngollak ah azu asa doin sum ka zon uh ciangin K.150 bang ka ngah sei a, tu tawh 1961-62 sang ka kah sei hi. Tu ahih man kapi na’ng hong deihsak ka nu leh ka u Ciin’ tungah ka lungdamna ka mangngilh sei o hi.

Tan luk ka tun ciang ahih leh pau le ham zong tel deuh ta lei ka hih manin laihuanna hawngah a nihna, a thumna ciang bang ka tungsei leibuang hi.

Tan luk ka on zawh, tan salih ka kah ciang ahih leh ka kum in siklai hi leh scholarship nangawn a ngahsei ing ciang dinmun ka tung tawto sei lei hi.

Tahan pan tan salih ka zawh ciang, Kawlpi High School ah tan liat ka sin a, zingsang nai 6:30 lap a Tahan pan kiallap zong ne zolo a ka kah zong haksa kasak belh khat ahi hi.

Tan liat ka tun ciangin scholarship hong piak luangin ka sangsap hong mapsak uh hi. 1963-64 kumin tan liat ka zo a, tan kua ka zomto leleu hi.