Autobiography of Rev.Dr.Samuel Nang Khan Do

KA PHUNGZON’ NA

Ka sum neih teng tawh sangkah sei buang in ci-in ka nu’ lak sangkah ing ka nget leh, ka nu’n ‘Do aw, na sangkah ing bel hi mah hi; tu laitak i dinmun pen numei phung sungah a om suak hi nginge hi hang. Na pa’n ka man ka mual hong pia man nailo in hong sihsanpaihna hangin, na pu te’n a mau phung sungah hong koih hi. Nikhat poh mit hakin om lecin, nang numei’ ta hong kicih ing pen ke’n za nuamlo hi’ng. Tu ahih ciangin phung le nam i zon’ masak lohin nadang ai mah ki soisei lo hi hong ci hi.

Ke’n bel Pasian in hong kem poh leh mi’ hong zawnsak hang ai phamawh se hiam, ka cih leh, ka nu in “Hi seilo, ka nuntaklai in phung le nam na zon’ masak lohin, ka si zong ka sih lim lo ing hi hong cih ciangin ka mang a, nipi khat sung Lawki tuak pak ing, phung le nam zong ing ngalai saai ing, tu zawh ciang Tapidaw suak leh paih ing ka cih leh ka nu’n ‘tuciang bel nang bek hi loin kei zong hong suak paih tong’ hong cih ciangin, Lawki suakpak in, lawipi nuta khat tawh ngalai saai in phung le nam ka zong hi.

Ka phung zon pen 1959 kum May sa sung ahi hi. Tu kum a kipanin Samte phung le nam ka tang hi. Hi banga meipum lei a, phung le nam ka zon uh ciangin ka nu in tu’n ka tup tung ei, ci in hi bangin la na phuak hi.

(a) Kawi tawh kum lo, von tawh lungkum,
      Zangta selawi sumtual ah tang khau khi’ng ee,
(b) Sumtual ah tangkhau khi’ng e,
      Phung aw, lambang veel ve vua.

(a) Phung siang lambang ka zon ni’n ee,
      Kawinem lausa ngai nang ee,
(b) Kawinem lausa zuang hong so dih aw,
      I pahtangah zaai hong awi ve aw.

(a) Phung in dainen bang nil tah ee,
      Von tawh phung siang zong ing,
(b) Ngual aw, nibang hong el lo vua,
      Phung lausa hual zo ing ee.

Ka tate’ tungah ka soiseih zel mah bangin ka nu tawh kamkum a phung zong-a ngatang kai a ka pa’ luang-a ka din hun in, ka tuat ciang ka kum 18 hawng pha pan ing, ci in ka kisuang liang zel hi.

KA NU’ MAN LE MUAL PIAKNA (1969)

Phung ka zon khit ciangin tavuan man ka kisak leh, ka pu in ‘Nang Khan Do aw, tu’n kei’ phung kei’ nam hong nusia a, nabeh naphung zuan na hih ciangin, na nu’ man nong piakkul ing hi’ hong ci leleu a, ka nu zu sasak in ka beh papi teng, ka u Suang Zam, Pu Al Dam te mah tawh kikumin, voktal khat leh khawmbeelpi khat tawh ka nu’ man pa ingin ka kuan uh hi. Kei’ upmawh bang loin, ka pu’n kei uh Ngunsungte pen nidangin sialpi khat mante (Ks.60) ka hi uh hi. Ahi zongin tuhun ciangin Ks.60 tawh sialpi khat kilei sei nawnlo ahih manin K.300 nong piakkul ing, ci in Ngatang hong piak ciangin, ka sum in cin lo ahih manin um le beel kaikhawmin ka numan Ks.300 tawh a kituak ing in ka pia uh hi.