Autobiography of Rev.Dr.Samuel Nang Khan Do

KA SIAPIPA UN HONG LAMTO

Laihuanno ah ka nau Sian Za Kham in a khatna, ke’n a nihna ka lak uh ciangin ka siapa uh lungdam mamah in tanthum hong kahto sak paih a, tanthum zong laihuanpi ah a onglam mahah ka kihel lei uh hi. Topa’ hong hehpihna tawh kum khat sungin tan nih leh tan thum a zosei ka suak uh a, Pasian’ min ka phat hi. Ka Siapipa’ tungah zong nakpi takin ka lung a dam mamah hi.

1956-57 sangkah kum ciangin Ngalzang ah Private sang kiphuan a, Sia Kang Khaw Thang (Zung), Sia Khoi Khaw Lian (Zung) siate’n limtakin lai hong hilh ahih manin, Thuklai sangpi pan tanli ka ong hi.

Tanli ka on ciangin, Tedim a ka u Bo Kham Nang khiang pan hong kah un, sum le pai a beite dadamin hong loh leh lel un ci in lai hong sak ciangin ka lungdam mamahin ka nu’ lak ka soi paih leh ka nu’n leiba sangba in sang kah lecin, a kua’n hong lohsag ing hiam, eima’n i zon zawh leh dadamin kah leh zaw in, ong cih ciangin nu’ thu man’na in ka khawl leh hi.

TAWMVEI SUNG KA NU HUHNA LEH SUM ZON’NA

Ka nu’n leiba-a sangkah ing hong awilo ahih ciang, sum zong heuh tong ka ci a, Bamboo Camp a lampi kekna Nuru Contract, Pu Suan Thang ukna ah mi’n K.3.50 salawh a, micia sacia kiphalo ahih manin, kei bel K.1.50 lawhin nakpi takin na ka sem hi. Phalbi zingsang tutungin na kilimsep mamah ahih manin, veikhat bang ka awm pan sisan hong suak liang a, ahih hang tangahte a hu Topa mah in zatui zatang kul loin hong damsak hi.

Thadah lo hong kisa tei ahih manin amia koli sungah Pu Mang Khaw En (Lamkamphen) in hong koih a, sa salih sung hawng na ka sem hi. Sum cil tentan ka hih manin sa khatin pek salih ka khom sei hi. Mi’n ahih leh 15 bang khom uh hi. Ka cil tentanna zong pen ka sangkah nop man bek ahi hi.

Koli sa salih sung hawng ka sep pen ka nu’ khutah K.400 val leh melseihte pumsun khat tek ka puak a, ka nu pan kipan melseihte a lungdam tek uh hi. Ka nu in sum tuzah mu ngeilo ahih manin veikhat leh beem sungah a koihna lalaih in, ka nuta un ka siasial zel uh hi. Tulai sum hileh tam mamah veve ing hi.