Autobiography of Rev.Dr.Samuel Nang Khan Do

Ka pu in ka sa hong hualsak a kipanin Sumthang suak ta ka hih manin, ka nu zong ka pute’n na tate lah kei ii hi zo, nang pasal na neih kul ing, a cih ciangin ka nu in ‘ka ta Nang Khan Do Lian’ mittang sungah tui a cin laiteng pasal ka nei ngei o ing hi’ ci ngam ek ahih manin a sangngamte’n satin vua liang zel a, ke’n zong ka nu ka kahpipih zel hi.

Hi zah tak a ka nu’ hong itna ka muh sesem ciangin Late laiatpa in ‘Topa aw, hi zahta-a nong it liang na’ngin kei ai hi leltak ka hiam’ a cih mah bangin, ka nu in kei takpi hi zahtak-a hong itna pen a ta ka hihna man a hihna ka phawk hi.

Ka tate’n zong a pi ii kei hong it mah bangin i nu i pate’n zong ei hi bang-a hong it hi tah a ci in nu le pa hong it seih na’ng uh, ka deihsakna lian mamah hi. At ing kilawm lo phial ahi zong, nu le pate’n tate a it zia ka phawksaknopna hang a hipen hi.

SANGKAH KIPATNA

Khuata sunga om ka hih manin pilna zong mi’ sin hunin kisinsei loin, kum sawmval ka phak ciangin sangkah ka kipan pan hi.

1951-52 in Upate’n Ngalzang ah Private sang khat phuan a, ka siapa uh Pu Zam Do(Bawmkhai) te hi in, lai hilh siam mamah hi. Ahi zongin, tawmvei lai hong hilh man bekin, Kawlhawhnat in hong si paih ahih manin tu kum sangkah hun a bei hong suak hi.

1952-53 ciangin Suangpi khua-ah Upate’n sang hong phuan leleu a, Pa Vum Khaw Hau in sangsia hong semin laihilh lam siam mamah ahih manin Kumpi sang Theizang ah laihuanpina ah ka vekpi phialun ka ong uh hi.

1953-54 ciangin khua-ah sang kiphuan zo nawnlo a, Theizang Kumpi sangah nipi khat annguai ing pua in sangkah ka kipan uh hi. Theizangah sangkah in ninga sung ka tam pen ka nu ngai-in ka lawmte’ muh lohna ah ka kap sisim zel hi.

TAPIDAW SUAHNA

Theizang sang ka kah ciangin, ka Siapipa uh Ngul Khaw Kam (Dolluang) Tapidaw picing na hi a, ama’ khianga sangkah peumah Tapidaw suakin na sawl papaih a, banah kei uh zong sang ka kah uh ciang Tapidaw in hong khum paih hi. Topa’ hong deihsakna a hi tang am ka no tungin Tapidaw ka ut khat hi a, kum sawm ka phak pan kipan kei le kei Tapidaw in ka kingaihsun hi. Ka Siapipa un hi bang a ka min uh Tapidaw-a hong khumna ka nu’ khiangah ka soi leh, a beisa hun lai-a siampi Pu Lian Zam ii thusuak na ciamteh lai ahih manin ama’n zong hong lungkimpih paih ahih manin ka lung a dam mamah hi.