Autobiography of Rev.Dr.Samuel Nang Khan Do

Pu Ngo Suan ii a tote’ tung pan thusuak a ngah a kipanin ka nu a situi hul nawn loin, sunin zanin hong kakap mai hi. Zan nangawnin ka tapa nungta lai hiam, ci in hong zawzawt zelin, ihmu seilo in, hong kakah zel hi. Tu manin hi bangin la na phuak hi.

(a) Kilbang ka khan sawt tah ee, cihna lo a,
      Mom na lai a ka sial za in tam sa’ng ee.
(b) Mom na lai a ka sial za in tam sang ee,
      Ka von seisen luansi in ningbang tum ee.

ci in la dawng sawm thum (30) a phuakna teng a la sipna in nei liang hi.

Pasian in, si nai o hen, ci hi ing hi ve’n, ni khat ka nu’ (lungsim sungah) ka khua uh pan tai 12 ki khawlatna Takkhawl a tonei Pu Lian Zam’ kiangah a kinileh in vapai vingveng hi. Tu kal in kei bel ka pu En Za Ngin leh ka u Suang Zam te’n hong kem uh hi.

Pu Lian Zam, khiang a tun’ uh ciangin a Tote dongsak paih a, a tote’n na tapa silo ing hi; a pute tuak hi, a pute’ lakah puleng in khutnum siim leh dam ing hi cih thusuak ngah hi. Tu bek hilo, mailam ah biakna sang lam a zuih o leh, a zangdawn kuan ciangin hong nusia leleu ing hi, cih thusuak tawh vaisaak hi.

Ka nu zong kal vingvengin ka pulai uh, kei hong itbel ka pu Thawng Khaw Neng’ tungah akluisan khat leh zu bekmai khat tawh khutnum simin ka kuan paih uh hi. Ka pu in, hi ka tupa Nang Khan Do aimah ka cin nuam o hi; cidam mulmamin, hinsau khansau in, ka nipi, ka sapi, ka Nungzai in thupha na pia in, ci in thupha hong piak khit ciangin, vokno dawng khat tawh hong sa hi.

Ka pute’nah ka pulen zawh uh a sawt loin mitnin lak bangin ka dam lam zong seilo liangin ka dam miau hi. Ka nu’ lungsim sungah, biakna sang kah o leh, a zangdawn kuan ciangin hong nusia veve ing cih a lungsim ling bangin na tang nginge hi.

KA PU SUAN IN KA SA HONG HUALSAK

Cidam lo, kuah le puak a ka om sung mah in, UMP a a tum ka pu Thang Suan ong kal a, a sa hualkul ahih manin bawng khat tawh ngal hong ai hi. Hi sungah ka pu in Nang Khan Do zong a si zong, a dam zong keima’ phung le nam a suak ingin, a sa ka hualsak ing ci in, Sumthang hong tangsak hi.

Ka nu’n lah a sangngampa’ thu nial ngam lo ahih hangin kilawm salo ahih manin hi bangin la na phuak ek hi.

(a) Bu-al ngia leg lengkeel sawnsan nong sim ding leh,
      Na laizom ding ciin aw hawm na cing nam aw.
(b) Sang na kap luang, lal na hen luang,
      khuamual min sei lo ve cia.

na ci suk hi.