Autobiography of Rev.Dr.Samuel Nang Khan Do

GAL VEN’ CIANGA KHUALAM ZOTNA (1945)

Kum 1945 kum ciangin gal hong veng sei a, lungdam takin pianna khualam March sa sungin ki zuan suk leh hi. Ke’n bel ahih leh galtai lam hi taleh, a kalleh lam hi taleh khat zong ka tel om lo hi.

Khualui ka tun uh ciangin, nu le pa’ lamsa inn bomb in na dengvang ngawpin, ki beel seilo ahih manin, ka pu Suante ka beel leleu uh hi. Ka pute’nah kum khat sung dawn hawng mah ka om uh hi.

INN HUUTNA

Nu le pa’ omna innah, ka huan sung uh ka nu in limtakin puah a, kaisum a dim teekin suan hi. A limcit laitakin Tedim mangte hong pai in, ka pu Vung Suan ii hauhsak laitak ahih manin a sangngam nu mainap bel ahi tang am, sakol leh laate sahna in nei a, ka nu ii humkui bakkai a a sepsa teng hong maimang hi.

Ka inn uh, bomb ii den’ teng leh a siate ka pu Thawng, ka u Suang te’n hong puahpih in, a ki om seih ing ciangin ka nuta thum un ka huut uh hi.

(a) Sanggah sausak phaisep limbuk,
Zin in keen lambang pial aw,
(b) Zin in keen lambang pial ve aw,
Luansi tui cin’ na hi ee.

Ka Pasian, ka nungzai aw, ka kongbiang ka bangkua ah Dawimangpa hong lutloh na’ngin na dalsakin, a cihnopna hi.

Meingong tangahin ka om laitakun, hong hehpih a hong khual ka pu Thawng Kho Neng, ka u Suang Zam, ka pu Al Dam, Pu Zeng Zam leh Pu Pau Khaw Thang te’ tungah nakpi takin ka lungdam a, hong kemte’ tungah Pasian in thupha a piak na’ng ka thunget sakna lianbel ahi hi.

KA CINATNA LEH THUSUAK KHAT

Ka innhuut zawh uh a sawt lo in ka khelpi hong na a, lam paisei lo ka hih manin ka nu in a sun a zanin hong kuahtop hi.

Ka nu zong keimah hong kepna in lungngim le tawl suahin a om laitak, Tonei Vankah sei Pu Ngo Suan ( ka lawmnu’ mindappa) in a tote’ tungah hong dotsak a, na tapa nungta lo ing hi, a pheipi kitamin si ing hi’ ci in thusuak hong ngah hi.