Autobiography of Rev.Dr.Samuel Nang Khan Do

KA PA’ LUANG PHOLHNA (DAIKHIATNA)

Ka nu in a pasal a itna a kum kai loin, a luang hong pholh paih a, a situi a naptuipi mah tawh a guhsia teng la in Lopi khua a teeng Pu Suan Khai’ bawngpi khat Rs.13 in lei in, i Zo ngeina cing tawh Sanlam na tangsak hi.

Kuamah tawh kikum lo a situi naptui tawh lungngai a ka pa’ luang la in, Sanlam ngeina cing tawh a ngui theih ciangin ka nu’n hi bangin la na phuak hi.

(a) Phung tawh kum lo, ka luansi tawh ngaih aw,
      Siang hong zong ve cia.
(b) Lang ka lam loh, lung ka tup man,
      Sawmsial tawh zinbang sa’ng ee.

na ci hi.

U le nau, beh le phung kicin’ nate ah zong i sih i bo ciangin ngeina cing tawh Sanlam tan’ ing hamsa a, a kipheingui mi tampite’ lakah meingong numei khat in a beh a phung a kikuppih ing omlopi mah in ama’ hanciamna tawh a pasal a pibawlna ka muh ciangin numei lakah numei citak pawl, meingong lakal zong meingong citak pawl khat in ka ngaihsun a, ka nu ka paakta mamah hi.

Ka nu leh ka pa, nupa a suah uh hun sawt hetlo a, ka tanu Ngoih Lam Cing zong a pasal Paupu tawh tawmveino sung nupa hong suakin a sihsan paih ciangin, ka hehnepna in, nang bel a pi sun na hi hi; napi zong nang’ pasal neih tan pasal nei man lo hi; ahi zongin nungak laitak a mei ngong ahih hangin, ka tapa Nang Khan Do mit sungah tui a cin lai teng pasal ka nei het oving hi, a cih mah bangin, nang zong na tat emit suanin , ni khat ni ciangin Topa in hehnepna khat tetei hong pia ing hi ci in ka tanu hehnepna in ka nei sawsawn hi.

Ka nu’n pasal a neihnop loh manin sing khuah suangtum tuak lawhliang a, hong ngak keikai ahih manin ka nu’ tungah ka itna khang sesem hi. Ka nu’ thuaknate ka mitin zong muhpihin ka kah pipih hun tampi zong tu’n ka sei lai nginge hi.

GALTAINA

Ka pa’ hong nutsiat zawh ciang, a tanote unau nih tawh koi bang nungta song ing, ci a lungmang a a om laitak, 1944 kumin Zogamah Japan gal hong tung a, tawlkhat sung lo lamah kibu hi.

A hi zongin, melseih pawlkhatte’n naunawn lei, ngamlum lei na hih uh ciangin mun dangah na kikhin un, hong cihna bangin Mualbem khuapi ah ki tai in Pu Ngen Khual te’ inn ah tawl khat ki om hi.

Mualbem melseih a beel mi kitam pian ahih manin annek tuidawnah haksa pian a, pawlkhatte Gungal ki kai in, Tumang khua a Pu Lut Khaw Ngin (ka mindappa’ sungte) ki beel leleu hi. Tumang khua ah gal ven dong loso kawmin ngalven ki ngak hi.

Hi galtai hun sungin a huh a en ing beh le phung kuamah omlo, pi le pute bek beel a, ka nu in a tate nih leh van tuatuam sakol vanpua bangin a vaksuk a vaktoh laitakin ka pa la na phuah hi.

(a) Dota patbang hong kisai ee, phung ii huai loh ka luansi tawh,
      Patsawl bang kihei ing ee.
(b) Ka sial zatam, ki oih ngelcing,
      Sim ngam huihsi laang bang ee.

(a) Leido lal hong zingzin ee, ngaih lausa aw,
      Lengvan sang pan vonngel nong sialpih nam aw.
(b) Von ngel nong sialpih nam aw ee,
      Na sinlai a tawl nam aw.

ci in a situi a naptui tawh a om lai tak a, a muhseihloh ka pa a hopihna ahi hi.