Autobiography of Rev.Dr.Samuel Nang Khan Do

KA PA’ CINATNA LEH HONG NUTSIATNA (1942 )

Ka pa pen inn le lo a kin, nasep a uuk, mi zaptel mamah khat hi a, Japan ngal hong tun madeuhin Kawlzang lamah sum zong ing-in a kuansuk leh sum salawh man nailo in, a cina in Tulsuk pan hong kipuato uh a, pulnatna ci ahih manin khua sungah tun ngam loin, ka khuataw uh Zaunuai lobuuk ah tawmvei ki kem hih tuak hi.

Inn leh lo a kikep bang ahih loh si leh zatui zaha tawh ki bawl ahih loh manin tu lobuuk mah panin a nuntakna hong beisan hi. Tu Zaunuai lobuuk ah amah bek si lo in, mi li hawng tu Zaunuai mun tungah na kiphum uh hi.

Hi ka pa’ luang tunga a kihel a luang hong phamsak, tu laitakin zong Tahan pan Nu Hang Dim, Nu Thuam Nem leh ka pi Ngiak Zente nungta lai uh hi.

Ka nu in keploh khaoiloh pi a, a nusiatna a lungsim ah a ngaihsut ciangin a lungsim kakap a, a kahla hi bangin na tamlawlawh hi.

(a) Omlai vei-a sangbang villoh,
      Sinlai guhling bang do ee.
(b) Thakia ding a, albang tah lo,
      Khunlan phaimit sing maw’ng ee.

(a) Kiak nading a, lentu sawlkaih,
      Ngaih aw, hawmtan zo ve cia.
(b) Tha na kiakna zinleng tumdang,
      Lunga ka ngil zo diam aw.

Ka lupna tung uh pan hi taleh, ka nu tawh ka lokuanna uh pan hi taleh, ka nu’n ka pa aphuah la hong sa zel a, om nuamlo in ka nuta hawngun ka kakap zel uh hi.

Hi ka pa’ hong nutsiat tungin, ka nu kum sawm nih kiim pasal neih phat tung hawng hipan ahih manin, ka nu’ ingin meigon a haksa mamah hong suak hi. Ka pute’n lah pasal nei a sawsawl, tangvalte’n lah he hel, ka nu’n lah ka tapa Nang Khan Do’ mit sung tui a cin laiteng pasal nei o tong, ci hi. Hi kikal a nuntak zong kua ma tek ingin a haksapi khat a hihna ka phawk a, ka nu ka itna khang sesem hi.