Autobiography of Rev.Dr.Samuel Nang Khan Do

INNTUAN’ NA

Tanu khat hong neihuh ciangin pi le pute’n Zo ngeina mah bangin phaibukno khat khualsakin, 1940 kum hawngin inn na tuan hileh kilawm hi.

Inntum lotum a, a om uh ciangin amau zong losawh singpuak hahkat mamah uh ahih manun, ankhing tuibuk kikhom tuak mamah uh hi.

Inn le lo tuam hong neih uh ciangin ki itna zong hong khang sesem in, 15^th May, 1941 ni-in tapa khat nei-in, ka pi Awi Nem in ka pi Nang a sihna laina lei-in a sin along do sa lei ahih manin, ka pu Thang Za Nang mah hong dapsak paih a, “Nang Khan Do Lian” hong sa hi.

Ka pi ii deihtak a hong phuahsa ahih manin mang a mat ingin zong a deihhuai lo ka min pen kilaih sei nonlo hi.

KA PA KHUTSIAMMI KHAT HI

I Paunak in ‘Sakhi api san ano san’ a cih mah bangin, ka pu’ khutsiamna, sakap siamnate ka pa in zong sunin, a nuntak tomno sung hong bawlsak ahi khunphahzaal leh bulut tu-dong mahin ka nei lai a, ka pu Thang Vung ii a kapsa Zangsial kiitungki (Sauvui-um) a kibawl pen tu’n ka nei lai hi.

Singsuih zong siamin, ka khua uh pan tai ngana Baakzang khuamun pan innkhuam ing ama khutin na sui a, ama satang mah tawh a puak, ama’n a lam man loh hangin, ka nu tawh innpi khat ka lamun ka pa’ singsuihsa khuam teng mah ka zangsei lai uh hi.

Hi ka pu' lamsa tungki leh ka pa' bawlsa khunphahzaalte tuhun tawh kituak ci-a ka koih hi loin, pute-pate' khutma ahihna hang a akem ngeungau ka hi zaw hi.

Ke’n ka sut zawh loh hangin ka pute, ka pite, ka nu le ka pate’ khutsiamna, ngalmat-sakapna lam a, a ngalpal mamah pawl ahih manun ka kipakta tuam mamah hi. Ka pu ii asa matsa salu hawm bang ka innpi vuah innsung-innpua, bangtung tengah dim pikpek-a, a kisuang ka tate’n hong muhpih lai uh hi.