Rev.Dr.Samuel Nang Khan Do' Nu le Pa Phawkna Mualsuang.
KA PA 'LANGH NGIN' (1918-1942)
Pa neilote’ pa leh meigong numeite a hupa pen, ama omna siangtho sungah a om Pasian ahi hi! (Late 68:5). Hi Late bulphuh-a ka tangthu a kaikhawm ka hi hi.
Ka pa pen Samte beh Pu Thang Za Lang I sangngamnu Pi Khup Niangte nih ki-itna tungtawn-a a piang tapa khat neih ahi hi. Khanglui hun lai-in numei leh pasal a ki-it mamah hangin, beh le phung, u le nau ii awiloh pi-in kiteng sei lo hi.
Ka pu leh ka pite uh zong amau nupa ki-it mamah ahih hangun, beh le phung leh u le nau’ lungkimpihna omlo ahih manin ka pi Khup Niang in Pu Thang Za Lang inn pan tapa khat hong nei a, a pu dapsak paih in Lang Ngin na phuak hi.
Ka pa pen ka pute’ kongbiang-bangkua mah pan hong khang tawto-in zi le ta a neih dong a pite a pute in pakta takin na kem na khoi uh hi.
KA PA’ ZI NEIHNA
Ka pa, pi le pu’ ang sung pan sialcing muan hong suah ciangin a koppih ing zi zonsak paih uh a, Sumthang beh Pu Vung Kham leh Pi Awi Nemte’ tanu thumna ka nu Thang Ngoih tawh na ngawm uh hi. Ka nu in zong nu le pa’ thu manna tawh zui a, ka pa’ nuntak dan leh a tagah dan hawng a seih ciangin hi bangin la na phuak hi.
(a) Kawi aw, mimbang napian lai-in, tun lo, zua lo,
Tulkaisuk-a mimphung bat sap na hiam aw.
(b) Mimphung batsap na hiam aw e,
Huihsi sem-a selnah nuaikia na hiam aw,
na ci hi.
Nu le pa’ thu manna tawh a awom leh 1939 kumin tanuno khat hong nei uh a, a kem, a pi dapsak paihin ‘Niang Khaw Ciin’ na phuak uh hi. Ka u Ciin pen nu le pa’ minsel in tu-dong tanu li leh tapa khat tawh tuni ciangdong hong uap lai-in, ka nu’ luang-a ka ngak ahi hi.
Copy Right©Cosmos International University Press
laimai 11